O pasado sábado 25 de marzo, a AGPTI (Asociación Galega de Profesionais da Tradución e da Interpretación) realizou a súa asemblea ordinaria no Museo do Pobo Galego. Os socios e socias aprobaron a reorganización das vogalías (coa incorporación de Ana Hermida como vogal de actividades) e grupos de traballo. Ademais, mantéñense xunta directiva, ademais da presidenta, Iria Taibo, a vicepresidenta Iria Castro, a secretaria Beatriz Fariñas, a tesoureira Laura Iglesias e os vogais Jose Rodriguez e Marta Pastoriza (comunicación), Paloma Barrera (formación), Carlos Valdés (tradución literaria), Lara Santos (interpretación), José-Luis Morais (Rede Vértice) e Gabriel Álvarez.
Ademais de aprobar a memoria de actividades e balance económico de 2022, aprobouse a proposta de actividades para 2023. Entre elas, unha das máis importantes é o lanzamento dunha campaña de visibilización das profesións da tradución e da interpretación. A proposta dos socios e socias presentes, traballarase tamén no ámbito da tradución de videoxogos. Este sector vive un importante problema co recoñecemento dos e das profesionais, e a AGPTI fará unha proposta divulgativa e reivindicativa, entre outros aspectos, para chegar ás persoas que están nos últimos anos dos seus estudos, mais tamén para que as persoas que consomen estes produtos coñezan a realidade do sector.
A semana próxima, a presidenta da asociación fará chegar ao Secretario Xeral de Política Lingüística varias reivindicacións en relación coa profesión, como a urxencia da convocatoria de exames de tradución xurada de galego. Ademais disto, tratarán sobre a petición conxunta coas asociacións vasca EIZIE e catalá Aptic sobre o recoñecemento por parte do Ministerio de Asuntos Exteriores das tradutoras e tradutores das linguas cooficiais.
A AGPTI, que na actualidade conta con 129 membros profesionais, é unha asociación fundada en 2001 co obxectivo de crear unha plataforma de comunicación entre os e as profesionais para a defensa do colectivo de traballadores e traballadoras da tradución e a interpretación, ademais da difusión da lingua galega como lingua de traballo neste sector.
