A AGPTI abre o prazo de preinscrición para o CURSO «XBENCH, EL SALVAVIDAS DEL TRADUCTOR», que terá lugar en Santiago de Compostela o día 26 de xuño de 2015. Será impartido por Rocío Serrano. Información en castelán aquí.
Imparte: Rocío Serrano
Rocío Serrano é filóloga e exerceu de profesora de idiomas ata que a informática e a tradución se cruzaron no seu camiño. Tras varios cursos de especialización, algún posgrao e moito tesón, leva xa oito anos traballando como tradutora, revisora e correctora autónoma (aínda que segue dando clase de cando en vez). Especializada en tradución técnica e con algún libro publicado sobre estas cuestións, tamén fai incursións noutros campos, como a mercadotecnia, aínda que o que verdadeiramente lle gusta é coñecer as entrañas das ferramentas TAO para sacarlles todo o partido posible.
A través do seu álter ego, Azote Ortográfico, flaxela sen piedade aos que ousan maltratar a lingua dende os medios de comunicación e as institucións. Tamén colabora na Cadena SER de Xaén, onde conta curiosidades lingüísticas.
Contido:
Xbench, unha aplicación deseñada pola empresa barcelonesa ApSIC, ofrece multitude de posibilidades para os tradutores: dende garantir a coherencia entre documentos dun mesmo proxecto ou as referencias proporcionadas polo cliente ata crear memorias en TMX a partir dun bo número de formatos de arquivo bilingües.
Esas son só dúas das súas infinitas posibilidades. A súa interface de usuario pouco atractiva adoita intimidar os usuarios; con este curso, aclararemos os aspectos máis prácticos do programa para sacarlle o máximo partido.
Presentación:
Sabes que hai montóns de erros, moitas veces debidos a despistes, que poderías evitar doadamente de forma automática? Sabes tamén que podes centralizar boa parte das túas buscas terminolóxicas, xa sexa os glosarios obrigatorios do cliente ou as túas referencias habituais? E que podes crear unha memoria compatible coa práctica totalidade de ferramentas TAO a partir de arquivos bilingües en diversos formatos? Existe unha aplicación capaz de facelo todo ela soa: Xbench, concibida para facilitar a vida aos tradutores.
Programa:
1. Introdución á ferramenta: que é Xbench e que pode facer por ti
2. Buscas (documentos, glosarios e memorias)
3. Consulta de obras en liña
4. Exportación de contidos
5. Control de calidade (QA)
a. Opcións de serie: como suple ou complementa ás ferramentas TAO con QA integrado
b. Coherencia con referencias obrigatorias
c. Coherencia entre documentos
d. Creación de listas de comprobación personalizadas
e. Expresións regulares
6. Diferenzas entre a versión gratuíta (2.9) e a de pagamento (3.0)
Duración:
4 horas
Lingua:
Este curso impartirase en castelán
Material necesario:
Será imprescindible que os asistentes leven consigo ou dispoñan do seu propio ordenador con polo menos a versión gratuíta de Xbench instalada (2.9).
Número mínimo de asistentes: 10
Número máximo de asistentes: 20
Horario:
Venres 26 de xuño: 16.30 – 20.30
Lugar de celebración
Facultade de Filoloxía – Universidade de Santiago de Compostela
Avda. Castelao s.n.
Campus Norte, C.P.15782
Santiago de Compostela
España
Preinscricións:
Para preinscribirse neste curso é preciso encher o formulario que atoparedes aquí.
Prazo de preinscrición:
Finaliza o 15 de xuño
Cotas de matrícula:
Socios da AGPTI e alumnos/persoal docente e investigador da USC: 45€
Socios da Red Vértice*: 55€
Non socios: 65€
Pregámosvos que non fagades o pagamento ata que non se vos confirme a que estades admitidos. A confirmación de admisión realizarase por correo electrónico e indicaránsevos os pasos que debedes seguir para formalizar a matrícula.
Dado que o número de prazas é limitado, darase preferencia aos socios e socias da AGPTI e aos alumnos e persoal docente e investigador da Universidade de Santiago. A admisión farase por estrita orde de recepción das solicitudes, criterio que se aplicará tamén no caso de que algún dos preinscritos non formalice a matrícula no prazo estipulado e sexa preciso recorrer á lista de espera.
*A Red Vértice está formada polas seguintes asociacións: AATI, ACEC, ACEtt, AGPTI, AIPTI, APTIC, APTIJ, ASATI, Asetrad, ATIJC, ATRAE, EIZIE, MET, Tremédica, UniCo e la Xarxa.
OFERTA DE ApSIC
A empresa titular de Xbench (ApSIC) ofreceunos o seguinte paquete promocional para os asistentes:
a) Unha licenza de un ano que se sorteará entre os asistentes ao curso.
b) Promoción 2X1: se mercan un ano ou máis de licenza nos 30 días seguintes ao curso, a empresa iguala o número de anos que teñan mercado (polo tanto, farían un desconto do 50%).
Agardamos que este curso sexa do voso interese.
Recibide un cordial saúdo,
Belén Carneiro e Cristina Sexto
Vogalía de actividades de AGPTI
actividades@agpti.org
www.agpti.org
