O día 10 de maio, a AGPTI participou na mesa redonda sobre saídas profesionais organizada pola Facultade de Filoloxía da USC e que tivo lugar no salón de graos da facultade coa moderación da vicedecana María do Cebreiro Rábade. O obxectivo deste coloquio foi dar a coñecer ao estudantado dos graos de Filoloxía distintos perfís profesionais, nomeadamente, tradución, edición e planificación lingüística. En representación da AGPTI, Rossana Couto Lago, tradutora e socia da AGPTI, falou ao estudantado de Filoloxía do seu perfil académico como licenciada, primeiro, en Filoloxía Inglesa e, posteriormente, en Tradución e Interpretación, da súa traxectoria profesional como xestora de proxectos e tradutora especializada particularmente no ámbito médico, e das vías de formación en tradución a partir dos estudos filolóxicos. Alén disto, presentou a nosa asociación, así como a guía práctica para o inicio na profesión que publicamos no ano 2014.
A participación nesta mesa redonda encádrase dentro do convenio de colaboración estabelecido entre a Facultade de Filoloxía da USC e a AGPTI.
