Premio Xela Arias

AGPTI outorga o premio Xela Arias, cuxa creación serve para celebrarmos o Día Internacional da Tradución (30 de setembro).

Este premio concédese a unha empresa, entidade ou persoa que destaque pola promoción da tradución ou interpretación cara ou desde o galego e os seus obxectivos son: pór en valor a nosa profesión e o galego como lingua de traballo e dar a coñecer o nome de Xela Arias (1962-2003), figura destacada na tradución ao galego e responsábel das versións na nosa lingua de obras de James Joyce, Gianni Rodari, Jorge Amado ou Roald Dahl, entre moitas outras.

O premio ten carácter simbólico e o xurado está conformado pola Xunta Directiva da AGPTI, aínda que a asociación pode convidar outras persoas ou entidades a formaren parte, entre elas a gañadora do ano anterior. 

As e os gañadores das edicións anteriores foron:

  • I Premio Xela Arias (2018): María Alonso Seisdedos pola súa longa traxectoria no mundo da tradución.
  • II Premio Xela Arias (2019): Facultade de Filoloxía e Tradución (FTT) da Universidade de Vigo pola súa importancia para a tradución e a interpretación en Galiza e en galego e pola colaboración en proxectos de todo tipo en relación coa nosa profesión.
  • III Premio Xela Arias (2020): NUMAX, S. Coop. Galega pola súa aposta polo galego, por un traballo coidado e de calidade e pola tradución dunha parte das pezas que emiten e distribúen.
  • IV Premio Xela Arias (2021): Viceversa. Revista galega de tradución, da Universidade de Vigo que este ano retomou a súa actividade, polo traballo que fai en relación coa teoría da tradución á nosa lingua, e pola súa traxectoria.
  • V Premio Xela Arias (2022): A Mesa pola Normalización Lingüística polo seu labor e dedicación na iniciativa de cambio da nova Lei Xeral do Audiovisual para conseguir que o galego teña financiamento anticipado nas producións audiovisuais nas canles e plataformas de televisión lineais ou baixo demanda.
Xela Arias (foto de Xulio Gil)
Xela Arias (foto de Xulio Gil)